🔥 प्रा. शिवाजीराव सावंत यांचा भाजपमध्ये प्रवेश होणार : सोलापूरच्या राजकारणात मोठी उलथापालथ!

NT NEWS 24 प्रतिनिधी – सोलापूर: शिवसेनेचे (शिंदे गट) सोलापूर जिल्ह्यातील ज्येष्ठ नेते प्रा. शिवाजीराव सावंत यांचा भाजप प्रवेश बुधवारी निश्चित झाला आहे. मुंबई येथे भाजपचे प्रदेशाध्यक्ष आमदार रवींद्र चव्हाण आणि सोलापूरचे पालकमंत्री जयकुमार गोरे यांच्या उपस्थितीत प्रा. शिवाजीराव सावंत भाजपमध्ये प्रवेश करणार आहेत.

प्रमुख नेत्यांचा समावेश

प्रा. शिवाजीराव सावंत यांच्यासोबत त्यांचे चिरंजीव राजवी अँग्रोचे चेअरमन पृथ्वीराज सावंत, वाकावचे सरपंच ऋतुराज सावंत, आणि शिवसेना शिंदे गटाचे माजी माढा तालुकाप्रमुख मनोज साठे यांच्यासह शिवसेनेच्या शिंदे गटाचा राजीनामा दिलेले सर्व पदाधिकारी भाजपमध्ये दाखल होणार आहेत.

राजकीय परिणामांची चर्चा

रणजितसिंह शिंदे यांच्या भाजप प्रवेशानंतर प्रा. शिवाजीराव सावंत यांचा भाजप प्रवेश होणार असल्याने, माढा तालुक्यात भाजप स्थानिक स्वराज्य संस्था निवडणुकीत चांगली कामगिरी करू शकते, असे राजकीय विश्लेषकांचे मत आहे.

शिवसेना सोडण्यामागचे कारण

प्रा. सावंत यांचा आजपर्यंतचा राजकीय प्रवास हा जवळपास शिवसेनेसोबत राहिला आहे. मात्र, जिल्हा अंतर्गत पक्षातील अंतर्गत कुरघोडींना कंटाळून तसेच पक्षश्रेष्ठींनी त्यांची दखल न घेतल्याने त्यांनी तीन महिन्यांपूर्वीच राजीनामा दिला होता. तेव्हापासून प्रा. शिवाजीराव सावंत यांचा भाजप प्रवेश कधी होईल याची चर्चा राजकीय वर्तुळात होती. बुधवारी होणाऱ्या प्रवेशाने या चर्चांना आता पूर्णविराम मिळणार आहे.

सोलापूरच्या राजकारणासाठी हा मोठा आणि महत्त्वाचा दिवस ठरणार असून, आगामी स्थानिक स्वराज्य संस्थांच्या निवडणुकांवर याचे मोठे परिणाम होण्याची शक्यता आहे.

Author: Bhayyasaheb Kambale

NT NEWS 24